Bergensavisen

I byrjinga av 1927 gjekk det sosialdemokratiske partiet og eit stort tal kommunistar inn i DNA. Dette skjedde i Bergen og i resten av landet. For å markere at samlinga innebar eit brot med splittingane i fortida, vart avisa Bergens Social-Demokrat stansa. I staden vart Bergens Arbeiderblad grunnlagt som organ for det nye sameina DNA i Bergen. Sentralt i redaksjonen stod Gunnar Ousland (redaktør), Oscar Ihlebæk og Frithjov Bergmann. Bergmann hadde vore redaktør i Arbeidet, og Ousland var redaktør av Bergens Social-Demokrat ved nedlegginga.

Som dei fleste andre arbeidaravisene vart Bergens Arbeiderblad forboden under andre verdskrigen. Etter krigen vart avisa hovudorgan for Arbeidarpartiet på Vestlandet.

Alf Hildrum vart tilsett som redaktør i 1981 og Olav Terje Bergo i 1984. 1980-åra var ein periode med ei rekkje redaksjonelle og driftsmessige endringar. I 1981 vart avisa lagt om frå ettermiddagsavis for heile Vestlandet til å bli morgonavis i tabloidformat for Bergen. Eit nytt trykkjeri vart samstundes teke i bruk. Som ei av dei fyrste avisene kjøpte Bergens Arbeiderblad i 1983 datautstyr til bruk i teknisk avdeling og i redaksjonen samtidig. I 1984 reiv avisa seg redaksjonelt laus frå Arbeidarpartiet.

Avisa var nær ved å gå konkurs i 1984, men sal av trykkjeriet, nye tekniske endringar og ein auke av opplaget førte til at avisa i 1989 for fyrste gong sidan 1930-talet gjekk med overskot.

I 1992 skifta avisa namn til Bergensavisen BA. Avisa gjekk i 1994 frå fullformat til tabloid i samband med at trykkinga vart flytta til eige trykkjeri.

Frå midten av 1990-talet gjekk industrieigaren Trond Mohn gjennom selskapet sitt Metava inn som aksjonær med 20 prosent eigardel og fekk plass i styret i avisa. I tillegg til stor statsstøtte sikra Mohns engasjement at avisa fekk eit trygt økonomisk fundament. Også Sparebanken Vest gjekk inn på eigarsida med 10 prosent. Amedia var inntil hausten 2024 hovudaksjonær med 70 prosent eigarskap. Same haust vart Amedia eineeigar av Bergensavisen.

Bergensavisen var ei av dei fyrste i Noreg som frå 1990 gav ut sundagsavis. Ho vart nedlagd i 2016.