Maghreb, på arabisk al-Maġrib المغرب, er ei samnemning for landa i Nordvest-Afrika: Marokko, Algerie, Tunisia, eventuelt også Libya og Mauritania.
Desse landa blir ofte omtala som arabiske, men dei har òg store etniske minoritetar som snakkar andre språk enn arabisk, særleg berberske språk.
Maghreb (al-Maġrib المغرب) viser på arabisk òg til Marokko aleine: al-Maġrib المغرب eller al-Mamlaka al-Maġribīya المملكة المغربية ‘Det marokkanske kongedømmet’ – eller bokstavleg ‘Det vestlege kongedømmet’.
Det arabiske ordet maġrib مغرب tyder ‘vest’ og er ei avleiing av verbet ġaraba غرب, som mellom anna tyder ‘gå ned, gla’, her brukt om sola. Maġrib مغرب tyder eigentleg ‘staden der sola går ned’. På same vis heiter ‘aust’ mašriq مشرق, som er avleidd etter same mønster av verbet šaraqa ‘stå opp’, slik at mašriq مشرق eigentleg tyder ‘staden der sola står opp’.
Namnet Marokko har ingen etymologisk samanheng med Maghreb (al-Maġrib المغرب), men er i staden ei omdanning av bynamnet Marrakech – på arabisk Marrākuš مراكش, med den marokkansk arabiske uttalen marrākǝš. Bynamnet er truleg av berbersk opphav, men den presise etymologien er omstridd.
Kommentarar (1)
skreiv Morten Seip
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.