Tankgewehr M1918
| Tankgewehr Modell 1918 | |
|---|---|
Ur fuzuilh Tankgewehr M1918 e Mirdi an Arme (Pariz). | |
| Kinnig | |
| Bro | |
| Doare | Fuzuilh eneptank un-tenn |
| Mont en-dro | Tennata dre zorn, dre vorailh |
| Munision | 13,2 mm TuF |
| Bloavezh ijinañ | 1917 |
| Produer | Mauser |
| Mare produiñ | Miz Genver 1918 - miz Ebrel 1919 |
| Niver produet | 15.800 (da nebeutañ) |
| Perzhioù teknikel | |
| Mas (hep kartouchenn) | 15,9 kg |
| Hirder | 1.691 mm |
| Hirder ar c'hanol | 984 mm |
| Hed-tenn efedus | 500 m |
| Tizh mont e-maez ar boledoù | 780 m/s |
| Lezenn | |
| Rummad e Bro C'hall | C |
An Tankgewehr M1918, anvet ivez T-Gewehr, zo ur fuzuilh eneptank alaman produet gant an embregerezh Mauser e dibenn ar Brezel-bed Kentañ. An arm kentañ a seurt-se ijinet en Istor e voe[1].
Istor
[kemmañ | kemmañ ar vammenn]Evit talañ ouzh an tankoù breizhveuriat ha gall nevez-erruet war an tachennoù emgann e dibenn 1916, an Alamaned a savas kartouchennoù 13,2 mm TuF (Tank und Fliege, "tank ha nijerez", gouest da doullañ war-dro 22 mm hobregon e 250 metr[2]. Sañset e oa ar munision-mañ bezañ implijet en ur vindrailherez, met dilezet e voe ar raktres. An embregerezh Mauser a ginnigas ivez ur fuzuilh un-tenn, diazezet war gwikefre dre vorailh ar Gewehr 98 standart en Deutsches Heer. Ur stumm brasaet anezhi e oa, kemmet he c'hulasenn evit gellet anduriñ ar wask degaset gant ar c'hartouchennoù 13,2 mm[3].
Un daoubez heñvel ouzh hini ar vindrailherez MG 08/15 a oa savet ouzh an Tankgewehr. Un arm hir e oa (tost da 1,70 metr). Servijet e oa an arm gant ur skipailh daou soudard : un tenner, hag ur pourvezier. Stummet e oant evit klask tizhout bleiner, mindrailher pe keflusker an tank enebour, a-raok lampat eus o goudor evit distruj an tank da vat gant greunadennoù-dorn[4].
A-drugarez d'ar Tankgewehr e oa pourveziet an droadegiezh alaman gant un arm hezoug gouest da dalañ ouzh hobregonoù skañv karbedoù dibenn ar brezel. War an dachenn bsikologel e oa ur mod da frealziñ anezho ivez, pa oa spontet kalz anezhe gant donedigezh ar c'harbedoù hobregonet nevez war an tachennoù-emgann. Perzhioù fall a oa d'an Tankgewehr : kalz a argil a zegase, pa ne oa sistem ebet da zousaat anezhañ c'hoazh. Klemm a rae ingal an dennerien chom bouzar pe kaout poan-benn goude an implij[3][4].
15.800 skouerenn eus an Tankgewehr da nebeutañ a voe produet gant Mauser etre miz Genver 1918 ha miz Ebrel 1919. Ur pezh priziet gant an dastumerien eo hiziv an deiz.
Daveennoù
[kemmañ | kemmañ ar vammenn]- ↑ (fr) HOUSTON Rob, STROYAN Christine (renerezh), Armes à feu de légende, Larousse, 2019, p. 165
- ↑ (en) 13 x 92Sr : [D] ; 13 mm Mauser T-Gewehr, Imperial War Museums (lennet d'an 22/09/2025)
- 1 2 (en) POPENKER Maxim, Mauser T-Gewehr, Modern Firearms (lennet d'an 22/09/2025)
- 1 2 (en) FORTIER David M., The First Anti-Tank Rifle Cartridge: 13.2mm TuF, Firearms News, 30/12/2019 (lennet d'an 22/09/2025)