Dán vahkoloahpa bealuštit ja ávvudit ovttaveardasašvuođa Anáris, Sápmi Pride -dáhpáhusas. Dáhpáhusa guovddážis leat Sámi seksuála- ja sohkabeallevehádagat.
Dán jagi prográmmas lea ráidovázzima ja ovdanbuktimiid lassin maid panelaságastallan, muitala dáhpáhusa okta lágideaddjiin Biret Haarla Pieski.
– Ságastallamis guorahallat ovdamearkan dan, mo dáidagiin sáhttá hukset ođđa máilmmiid ja govahallat earálágán duohtavuođaid, mat livčče kánske buoret, lieggasut ja eanet empahtalaččat, eandalii girjái geahččanguovllus.
– Panelaságastallamis gieđahallet maid girjáivuođa sámegielas ja makkár molssaeavttut livčče ovdamearkan binára fuolkesániid sadjái, vai sánit eai livčče čadnojuvvon sohkabeallái, muitala Haarla Pieski.
Lágideaddji ieš vuordá festema ja gávnnadeame earáiguin, muhto dehálaš lea maid muitalit arvedávgesápmelaččaid dilis.
– Min Sápmi ii leat vel áibba dorvvolaš sadji girjái olbmuide ja mun sávan ahte dat mánát ja nuorat geat bajásšaddet dáppe ahte sis lea buoret dilli ja oažžu ráhkistit friddja ja ohcat iežas identitehta dorvvolaš sajis go dat lea goit olmmošvuoigatvuohta.
Prográmmas lea ságastallamiid lassin maiddái fanastuvrra Anárjávrri alde, man oktavuođas beassá oaidnit Ritni Ráste Pieski Drag Show. Dasa lassin dáhpáhusa áigge lávddastit Anna Morottaja, Hillahomot, DJ Radio-JusSunná ja eahkedis Papanas Freak Out! ja Vegard Bjørsmo.
Dán jagáš Sápmi Pride lea lágiduvvon ovttas Suoma Sámi nuorain ja Anár Pridein.
Rievdaduvvon 10.8.2026 diibmu 13.29: dárkkálmahtton áššái, ahte Biret Haarla Pieski ii leat okto lágideamen Sápmi Pride, muhto son lea okta lágideaddjiin.