Sotnabeaivve lágiduvvo Avvilis vuosttas Pride-ráidovázzin. Anne Olli lea okta ordnejeddjiin ja oaidná das leat stuorra mearkkašumi.
– Mu mielas lea gal vuhtton, ahte Avvil dárbbaša dan, lohká Olli.
Olli mielas Avvilis lea ain hui konservatiiva vuoigŋa.
– Mun jáhkan dat dahká buori dan gillái.
Olli lohká, ahte konservatiiva vuoigŋa vuhtto sosiála media ságastallamiin gos lea sáhka prides. Maŋimus áiggiid iešguđet Facebook-joavkkuin leat leamaš garra ságastallamat Avvil Pride birra.
– Gal olbmot jolgejit čállit dohko váikko maid.
Olli lea ieš bajásšattan Avvilis ja lohká, ahte gilli ii leamašan hirbmat ustitlaš báiki bajasšattat.
– Mun lean ságastallan das máŋggaiguin ja mun in leat áidna geas lea dat vásáhus, ahte dat ii leat nu šiega dat gilli. Doppe lea dárbu dasa, ahte doppe dáhpáhuvvet maid somás áššit ja ahte doppe boahtá oidnosii, ahte doppe ellet maid olu arvedávgeolbmot, lohká Olli.
Ráidovázzin vuolgá johtui 28.6. gaskabeaivve Avvila valáštallangiettis ja manná njelješgeainnu mielde gitta gielddadálu šilljui. Doppe dollet maiddái sáhkavuoruid.
Ráidovázzin ordnejuvvo Avvilis dan gudnin, ahte Anára gielda levge dál vuosttas geardde Pride-leavggain. Das lea stuorra mearkkašupmi arvedávgeservošii, muitala okta lágideaddjiin RadioJus Sunna, Sunna Nousuniemi.
– Dathan lea vuolgán min servoša nuorain, ahte sii leat dan álgaga čállán ja bivdán Anára gieldda searvat levgemii.
Ášši leamašan máŋgii gielddas gieđahallamis ja golggotmánus gielda mearridii levgegoahtit riikkaidgaskasaš seksuála- ja sohkabeallevehádagaid beaivve, ja dalle go Anáris ordnejit Pride-dáhpáhusaid.
– Sávan, ahte olu olbmot bohtet. Das lea eandaliige sáhka nuorain ja sin boahttevuođas, ahte mo min nuorat dovdet ahte dat lea buohkaide ruovttubáiki, girjáivuhtii lea sadji, ja lea oadjebas leat arvedávgeolmmoš dáppe, čilge Nousuniemi.
Anára girkosiiddas leat ordnen máŋggaid Pride-dáhpáhusaid. Jagis 2017 Maiddái Sápmi Pride ordnejuvvui Anáris.
Sámeguovllus maid Ohcejoga gielddas leat mearridan, ahte levgejit riikkaidgaskasaš seksuála- ja sohkabeallevehádagaid beaivve ja jus Ohcejogas ordnejit pride-dáhpáhusa.